آنا جان

هارا قاچسین انسان - شهریار

هارا قاچسین انسان ؟

 

جانا گلمیشیک بیز بو جانان الیندن

که انس امان تاپدی نه جان الیندن

مسلمانه باخ ، دین و ایمان قان آغلیر

بو دین سیز ، ایمان سیز مسلمان الیندن

بو شیطاندی ، بیز آدمی گؤیده توولار

قاچا بیلمز آدم بو شیطان الیندن

آلار اول ایمانی ، سوندان دا جانی

نه ایمان قالار دیبده نه جان الیندن

قاریشقا کیمی دئو نزادی قیمیلدیر

که خاتم چیخیب دیر سلیمان الیندن

بادمجان چوخی بازیلاردا کوچوکلر

دا ترپشمک اولماز بادمجان الیندن

خوروز تک بیزی دنله ییب قورتاریبدیر

چینه قالماییب نو چینکدان الیندن

پناه اولسا بیز خلقه کافر ، قوی اولسون

سیخینتی دوشه ک کفره ، ایمان الیندن

گئدیب چؤلده کی حیوانا یالوارایدیق

که گلسین ، بیزی آلسین انسان الیندن

ائله تورشادیب ایرانین عیرانین کی

گؤزللر گؤزی یاشدی ایران الیندن

سالیب دیر اله ، سانکی موسا عصاسین

قاچیر اژدها لر ، بو ثعبان الیندن

نه سلطانلار اولموش الینده اویونجاق

نه گلسین اویونجاقلی سلطان الیندن

بئش اوچ باش بیله ن ده قالیرسا ، اوشاق تک

قاچیب گیزله نیب لر ، بو خورتان الیندن

ائویم زندانیم ، ماموروم اؤز ایچیمده

هارا قاچسین انسان بو زندان الیندن ؟

بیز انسان اولاق ، یا کی حیوان ، اما یوخ

نه انسان قوتارمیش ، نه حیوان الیندن

نه دئولر کی قیطانلا زنجیرله نیب لر

قنف لر قیریلمیش بو قیطان الیندن

سالیب خلقی درمان آدیلان نه درده

که درد اغلاییر بئیله درمان الیندن

دو بیگ خان یازیقلار نه انسانیمیشلار

عبث آغلیاردیق او بیگ خان الیندن

وئرردیک قدیم دیوانا عرضه ، ایندی

کیمه عرضه وئرمک بو دیوان الیندن

نه طوفانه راس گلمیشیک بیز ، مگر نوح

گله قورتارا خلقی طوفان الیندن

اولا - عمادالدین نسیمی

اولا

عاشق یولوندا گرک کیم ، حمول اولا

معشوقه دن اونا نه گلیرسه قبول اولا

گرچک محبته جور و جفا ، چونکی ریا ائده ر

نئیچون جفادان اینجیه ، غمدن ملول اولا؟

ناز و نعیم و عشرتی جاوید ایچینده دیر

دیلبردن اول کؤنول کی ، مرادی حصول اولا

هر عاشقین کی یارایله اولدو قاورچون

عارف یانیندا آنین بوالفضول اولا

شیرین حلاوت اول یئمیشی کی صدرهسی

ذاتیندا خوب خلقتی شیرین اصول اولا

یوخدور نصیبی عشقی حقیقتدن ای کؤنول

شول کیمسه نین کی مرشدی ناقص عقول اولا

ای خالقین امانتینی زای ائیلییه ن

لایق دیر آدا اول کی ظلمن جهول اولا

گر شرح ائدرسم آیت حسنون کتابینی

هر باب ایچینده فصلینه یوزمین فصول اولا

معراجه چیخدی روح نسیمی بوراق الین

شول لاشه دن نه فایده کیم لاظلول اولا

بیگانه بیگانه - حمیده رئیس زاده

بیگانه بیگانه

گلیبسن اوز اوزه باخما منه بیگانه - بیگانه

اؤتورمه ایریلیق یوردون گزیم دیوانه - دیوانه

دولاندیر بیر باخیش رطلین منیم احوالیمه گاهدان

گؤزوندن قوی ایچیم گیزلین چاخیر پیمانه - پیمانه

نظر سال قات - قات آیریلسین جانیمدان غربت آثاری

آچیلسین شعریمین یارپاقلاری میخانه - میخانه

سینیخ سالخاخ اوره کلردن ایزین گؤرسه تدیلر خلقه

قالیب کؤنلوم جلالیندانایراق ویرانه - ویرانه

منیم شوقومدور عالمده ، جنون رنگینده پایلاندی

گؤرور هر یئرده بیر شعله ، یانیر پروانه - پروانه

منم مجنون ، منم لیلا ، منم وامق ، منم عذرا

منیم دردیم دوشوبدور دللره ، افسانه - افسانه

سحر ال چک یاخامدان ، حایل اولما منظر وصله

چکیل گئت بیر گؤروشه جان وئریم جانانه - جانانه

سؤزلوک - ت

سؤزلوک - ت

تاپا : آغیزلیق ، قاپاق

تاپپا تاپ : شاپپا شوپ ، تاپداماق سه سی

تاپدیق : اله گتیردیک ، گؤزله مه میشدن اله گلمه

تاپشیریق : بیری سینین نین یانیندا بیر نه سنه قویما

تاپقیر : آت ائششک بئلینه باغلانان ایپ

تاپماجا : تاپیلمالی بیر سؤز

تاپیشما : بیری بیرینه چاتما

تاتاری : رئزین قامچی

تاخیل : بیتگی بوغدا آراپا کیمی بیر اکین لر

تاخیل بیچه ن : آرپانی بوغدانی ییغیشدیران

تارلا : زمی

تاغالاق : قارقا

تالاشا : آغاج دمیر نارینی

تالوار : آلاچیق

تامارزی : گؤرمه میش

تامو : اؤلندن سورا سوچلولارین یئری ، جهنم

تای بوینوز : بیر بوینوزلو

تای : توش ، یولداش

تایا : اوت قالاغی

تای دئییشیک : او تای بو تای، ته رسه

ته رلان : چالاغان ، قیرقی

ته زک : مال داوار پوخو

ته که : ائرکک کئچی

ته گه : قاوین قارپیز بامادور تاغی

ته نه ک : زوغ

ته نه : سیرغا

آنا

آنا

سنه دونیا دئسه م ، دونیا اینجییه ر

اؤزون دونیا بویو ، دونیاسان آنا

سن سیز یئتیم قالار تورپاقدا داش دا

بوتون کائناتا آناسان آنا

هردن دوشونجه لی عالم اولورسان

ناخلف ائولادا ظالیم اولورسان

هردن چشمه سن ، معناسان آنا

ایسته رم کی سندن قاباق اؤلوم من

قوی چکیم سنین یولوندا جفانی من

اؤزون چال بالا نا لای - لایی آنا

بئله تئز قوجالما آنا آماندی

آغارمیش ساچلارین نه پریشاندی

عشقین طراوتلی ، قلبین جاواندی

ساچینا یاخاسان حنانی آنا

گل ای بئیله منیم جانیمی ایسته

کمکه گلرم لاپ سون نفس ده

سن ده عکس اولونا یاخجی دا پیس ده

لکه گؤتورمه ین آیناسان آنا

آنا آنا جان آنا ، هارداسان وفاداریم

آنا آنا جان آنا گل منیم وفاداریم

نئجه مهربان دی نئجه عزیز دی

نئجه رحیم لی دی آنا اوره یی

سیندیرسان سن اونی بیل کی نادان سان

سیزلایان کاغاذدی آنا اوره یی

بؤیودور بالاسین چتین قاطاردا

هم یازین همی ده بوراندا قارداپ

آنا آنا جان آنا هارداسان وفاداریم

آنا آناجان آنا گل منیم وفاداریم

بوردا قولاغ آسین

زینب - ملاپناه واقف

زینب

بنفشه تک عنبر زولفون بوی وئریر

هر یویوب سرنده هاوایه زینب

اونون عطرین داماغیمدان سیلمه سین

امانت ائت باد صبایه زینب

قاشا وسمه ، گؤزه سرمه چکنده

سیاه زولفو دال گردنه دوزه نده

ساللانیبان کهلیک کیمی سه کنده

اوخشارسان یاشیل باش سونایه زینب

سنی سئون چوخ بلایه توش اولور

عاغیل گئدیر باشدان فراموش اولور

آوازین گلنده جان بیهوش اولور

قربانام او نازک صدایه زینب

یاناغی لاله سن قامتی داغ سان

آغزی شکر دیلی دوداغی بال سان

سن سن کی یورغون وحشی مارال سان

اولوبسان یاراشیق اوبایه زینب

سن سن پادشاهی خانی واقفین

عاغلی هوشو دین ایمانی واقفین

حسرتیندن چیخدی جانی واقفین

نولورکو گلسن بورایه زینب

Wortschatz – 4

 

Wortschatz –4

 آلمانی - فارسی - ترکی آذربایجانی

zwischen - مابین - اورتادا

zwischenhändler - واسطه - دلال

zwischenhändler- نفر وسط صف - صفین اورتادا دورانی

der Zwischenlage - انبار موقت - آنبار

zwischenstation - ایستگاه وسط راه - یول اوستونده کی دوراق

der Zwischenakt - میان پرده - اویون آراسیندا اولان بیر هاویر

zwischen belenden- قطع کردن یک برنامه و پخش تبلیغات - برنامه آراسیندا تبلیغ

zwischen landen- توقف کردن هواپیما در بین راه - تیاره نین یول آراسیندا

ساخلاماغی

zwischendrin - در وسط - آرادا

zwischendurch - در بین - اورتادا

das Zwischenergebnis - در این میان - بوآرادا

der Zwischenfall -حادثه ناگهانی - آغیلا گلمه ین قضووقدر

die Zwischengerade - مسیر مستقیم - دوز یول

das Zwischengeschoß - طبقات میانی در ساختمان - دام داشدا اولان اورتا قات

die Zwischenmahlzeit - غذای مختصر بین دو وعده غذائی - ناهار شام آراسیندا

یئییلن بیر خیرداجا تیکه

die Zwischenzeit - روابط انسانی - جماعات آراسیندا گئت گل

Zwischenstaatlich - بین المللی - دؤولت لر آراسی

die Zwischenstunde - ساعات فراغت بین ساعات کار - ایش آراسیندا اولان بیر

آزجا دایانماق

das Zwischendeck - عرشه های میانی کشتی - گمی نین آراسینداکی عرشه

لر

das Zwischending - در وسط - اورتادا

نولا - عمادالدین نسیمی

نولا

شو لب شیرینه یارب گر شکر دئرسم نولا؟

شول گونش طلعتی آیا گر قمر دئرسم نولا؟

آدمی نولینده مقلی گؤرمدی دور فلک

شول جهت دن گر سنه خیرالنسا دئرسم نولا؟

شول گول عذرا داغیلان عنبر صفتلی سنبله

عنبرین ریحان عجب ، یا مشک تر دئرسم نولا؟

بیلمه ین عشقین طریقین هر خبرسیز غافله

چون هدایت بولمامیش ، گر بی خبر دئرسم نولا؟

سن سیز ای جان جهان ، بیر پولا دیمز کاینات

هئچه دیمز نس نیه گر شول قدر دئرسم نولا؟

گر اوزین آیین گؤونه ، ای جهانین فتنه سی

شبهه سیز حقی گؤرن صاحب نظر دئرسم نولا؟

کیم کی حقی پرده سیز اوزونده ، ای جان گؤرمدی

بی بصیرت دیر اگر او بی بصر دئرسم نولا؟

زلف رخسارین دی ای جان سوره نور و دخان

گر بو معنی دن اونا شام و سحر دئرسم نولا؟

نور ایماندیر جمالین کیم کی ، صدقنا دئمز

کافر و مشرکدیر ، اونا دیو اگر دئرسم نولا؟

چون نسیمی نین مقامی قافیمیش عنقا مثال

شول معللا قدره گر آری گوهر دئرسم نولا؟

سیغمازام - عمادالدین نسیمی

سیغمازام

منده سیغار ایکی جاهان، من بو جاهانه سیغمازام

گؤوهری لامکان منم، کؤونو مکانه سیغمازام

عرشله فرش و کافو نون منده بولوندو جومله چون

کس سؤزونو و ابسم اول، شرح و بیانه سیغمازام

کؤونو مکاندیر آیتیم، ذاتی دورور بیدایتیم

سن بو نیشانلا بیل منی، بیل کی، نیشانه سیغمازام

کیمسه گومانه ظن ایله اولمادی حق ایله بیلیش

حققی بیلن بیلیر کی، من ظنّو گومانه سیغمازام

صورته باخ و معنینی صورت ایچینده تانی کیم

جیسم ایله جان منم ولی، جیسم ایله جانه سیغمازام

هم صدفم، هم اینجییم، حشرو صیرات ادینجییم

بونجا قوماش و رخت ایله من بو دوکانه سیغمازام

گنجی-نیهان منم من اوش، عئینی-عیان منم، من اوش

گؤوهری-کان منم من اوش، بحروو کانه سیغمازام

گرچی موحیطی-اعظمم، آدیم آدامدیر، آدمم

دار ایله کونفکان منم، من بو مکانه سیغمازام

جان ایله هم جاهان منم، دهریله هم زامان منم

گؤر بو لطیفئیی کی من، دهرو زمانه سیغمازام

نجوم ایله فلک منم، وهی ایله هم ملک منم

چک دیلینی و ابسم اول من بو لیسانه سیغمازام

زرره منم، گونش منم، چار ایله پنجو شئش منم

صورتی گؤر بیان ایله، چونکی بیانه سیغمازام

ذات ایلیم صیفات ایله، قدر ایلیم برات ایله

گولشکرم نبات ایله، بسطه دهانه سیغمازام

نار منم، شجر منم، عرشه چیخان هجر منم

گؤر بو اودون زبانه سین، من بو زبانه سیغمازام

شمس منم، قمر منم، شهد منم، شکر منم

روحی-روان باغیشلارام، روحی-روانه سیغمازام

گرچی بو گون نسیمیم، هاشیمیم، قورئیشیم

بوندان اولودور آیتیم، آیت و شأنه سیغمازام

آلینا - عمادالدین نسیمی

آلینا

نور تجلی شعله سی دوشدی ازل ده آلینا

 

گؤزلریمین بو رنگیله ، یاشی بویاندی آلینا

 

هم معجزاتی احمدین گؤزلری سحریدیر آنین

 

رحمتی حق بو جادونون امتینه آلینا

 

جهد ائدره رم کی الینا گؤنلومو وئرمه دیم ولی

 

هم بیلیرم کی عاقبت الینه کؤنلوم آلینا

 

کیمسه اگر کی ایسته مز دوشمگی فتنه یه ولی

 

شکر ائدیرم کی ، دوشموشم عالی گؤزوندن آلینا

 

دوشدو نسیمی نین باشی زلفی کیمی ایاغینا

 

دوشه لی جان گؤزو آنین بدری معمم آلینا

مرحبا - عمادالدین نسیمی

مرحبا

 

مرحبا خوش گلدین ای روح روانیم مرحبا

 

ای شکر لب یار شیرین لامکانیم مرحبا

 

چون لبین جام جم اولدو نفخه روح القدس

 

ای جمالیم ، بهر کانیم ، مرحبا

 

کؤنلومه هئچ سندن اؤزگه سنه لایق گؤرمدیم

 

صورتیم ، عقلیم ، عقولیم ، جسم و جانیم ، مرحبا

 

ای ملک صورتلی دلبر ، جان فدادیر یولونا

 

چون دئدین لهمیکه لهمی ، قانا قانیم مرحبا

 

گلدی یاریم نازیله ، سوردو نسیمی نئجه سن؟

 

مرحبا خوش گلدین ای خیردا دهانیم مرحبا

اونوت - مدینه گلگون

اونوت

قیردین اوره ییمی بیر غفیل سؤزله

اونوت نه دانیشدیر ، نه دیندیر منی

اوینادین کول آلتدا کؤزه رن کؤزله

اونوت نه دانیشدیر ، نه دیندیر منی

*

سانکی دولو دوشدو  بو چؤله ، دوزه

گوللرین کؤینه یی بولاندی توزا

بیر دلی روزگارلا قالدیم اوز - اوزه

اونوت نه دانیشدیر نه دیندیر منی

*

سؤز وار حسرت گؤزده اومید یاندیرار

سؤز وار ، ائشیدنی بوز تک دوندورار

سالامی ، ساغ اولو کوله دؤنده ره ر

اونوت نه دانیشدیر ، نه دیندیر منی

*

سؤز وار خیردالاسان دوشر قیمتدن

سؤز وار قیمتلی دیر هر بیر نعمت دن

سؤز وار اوجوزلاشار ناشی صحبت دن

اونوت نه دانیشدیر ، نه دیندیر منی

*

همیشه آغاجلار کؤلگه سالماییر

طبیعت دئییشیر بئله قالماییر

عارف اول ، قیزیلی گوموشدن آییر

اونوت نه دانیشدیر ، نه دیندیر منی

*

بیر ائوی تیکمه یه نه وارکی ایندی

تر تؤکدوک ، دوزه نلر گ.لزارا دؤندی

قیزیلمیش اوره یی تیکمک چتین دی

اونوت نه دانیشدیر ، نه دیندیر منی

*

هر شئی بیرجه آندا داغیلدی گئتدی

سینه مده ائله بیل بیر کامات اؤتدی

بیزی بیرله شدیرن یوللاردا ایتدی

اونوت نه دانیشدیر ، نه دیندیر منی

*

سؤزو مجراسیندان چیخارتدین نئیه

دئدیم دوسلوق سیغماز داش تره زی یه

سنی آند وئریرم بو یئره گؤیه

اونوت نه دانیشدیر ، نه دیندیر منی

*

بیلمه دین هله ده نه چی یم کیمم

بیلمه دین بیر کامان اوستونده سیمم

بیلمه دین سؤز دولو من بیر عالیمم

اونوت نه دانیشدیر نه دیندیر منی

*

سیغینیب کؤنلومه خیالدایام من

بیرجه کؤنلوم بیلیر نه حالدایام من

گاه دنیزده گاهی ساحیلده یم من

اونوت نه دانیشدیر نه دیندیر منی

*

قوی قالیم اؤز کیچیک گوزارانیمدا

سؤزوم جانا گلر اورک قانیمدا

اومید یئلکه نیمله چیخمیرام یولا

اونوت نه دانیشدیر ، نه دیندیر منی

*

سلام بر خرمشهر

خرمشهر آزاد شد

آرزولاریم امیدلریم - مدینه گلگون

آرزولاریم امیدلریم 

عؤمروم پائیزیله قیش آراسیندا

یول سالدیم داغ ایله داش آراسیندا

عؤمروم دئییل گؤزله قاش آراسیندا

منیم آرزولاریم ، امیدلریم دیر

*

یاغیش سئوداسیله دولان بولودلار

او هنر یازیلی عنوانلار ، آدلار

تورپاقین قوینوندا جوجرن اوتلار

منیم آرزولاریم امیدلریم دیر

*

آیلارا ایللره همسفر اولان

آیلارا ایللره کررپو سالان

ایلهامی شفقتی ائللردن آلان

منیم آرزولاریم امیدلریم دیر

*

بیر گلین آنانین سئوگی دونیاسی

بیر کؤرپه بالانین شیرین رؤیاسی

باهارلی باغلارین پائیز خونچاسی

منیم آرزولاریم امیدلریم دیر

*

وطنین چاغلایان بوز بولاقلاری

وطنین بال دادان اؤز بولاقلاری

وطنین توکنمز سؤز بولاقلاری

منیم آرزولاریم امیدلریم دیر

*

گؤیلرین اولدوزو ، آیلی عالمی

یئرده یاشیل تارلا ، کهربا زمی

دالغالار قوینوندان یول آچان گمی

منیم آرزولاریم امیدلریم دیر

*

عؤمرومون طوفانلی یاغیشلی یولو

ناراحات گونلردن ناخیشلی یولو

عؤمرومون داشلی ، یوخوشلو یولو

منیم آرزولاریم ، امیدلریم دیر

*

نعنالی ، مرزه لی ، رئیحانلی لکلر

قووسی قزه لردن سوزولن رنگلر

وطن گؤی لرینده چاخان شیمشکلر

منیم آرزولاریم ، امیدلریم دیر

*

چؤللرین دیزلرین زومرود پالتاری

اینسانین ، اینسانا عهدی ایلقاری

قوشلارین وطنه دؤنن قاتاری

منیم آرزولاریم ، امیدلریم دیر

*

اوزومه آچیلان هر آیدین سحر

نغمه مه نور چیلر ، قول – قاناد وئره ر

ساچیما تؤکولن بو آغ چیچکلر

منیم آرزولاریم ، امیدلریم دیر